MIWD Board of Directors, indi mag-untat sa ila trabaho bisan may ginpadala nga Cease and Desist Notice si Mayor Joe Espinosa

Iloilo City — Indi mag-untat ang mga miembro sang Metro Iloilo Water District Board sa ila trabaho bisan pa may ginpadala nga Cease and Desist Notice si Mayor Joe Espinosa.   Suno kay MIWD Corporate Legal Officer Roy Villa, wala sang probisyon sa laye agud mag-untat ang Board sang ila function. Bisan si Espinosa suno kay Villa, wala sang natumod nga probisyon sang laye nga nagamandu sa board nga mag-untat na sa pagtrabaho.  Sa subong, wala pa sang plano ang MIWD nga magdiretso sa korte bangud wala man sang ginhimo si Espinosa nga kwestyunable.

Sa pihak nga bahin, kumpiyansa si Villa nga napa-athag nila upod sa MetroPac Water Investments ang 12.3 billion pesos nga joint venture agreement kag nakumbinser ang mga miembro sang City Council sa presentasyon kahapon. Ginsulit ni Villa nga daku ang mabulig sang joint venture agud makahatag sila sang mas maayo nga serbisyo sa mga konsumedor.  Sakup sang kontrata ang rehabilitasyon, repair kag maintenance sang distribution lines sang MIWD. (JoMaque)