Traffic Rerouting Ipatuman Sa Opening Salvo Sang 50th Anniversary Sang Dinagyang Festival
Iloilo City – Handa na ang tanan para sa Opening Salvo sang 50th Dinagyang Festival karon sa hapon.
Ala-1 sang hapon, suguran sang Public Safety and Transportation Management Office ukon PSTMO ang traffic rerouting sa mga dalan nga labayan sang parada. Magasugod ang programa alas-2 sa hapon sa diin may lima ka minutos nga choreographed nga saut ang kada tribu. Magasunod ang mga tribu sa carousel-type nga parada sa lima ka judging areas sa Freedom Grandstand, Capitol area, Mabini-Delgado streets, Quezon-Ledesma streets kag Maria Clara, City Proper.
Mas malip-ut ang pagpasundayag sang mga tribu sa subong nga Opening Salvo suno kay Mr. Robert Alor, tribe-in-charge sang Iloilo Dinagyang Foundation Incorporated apang balantayan ang ila full performance sa Ati Tribes competition sa Enero 28.
Gina-imbitar ni Mayor Joe Espinosa ang mga pumuluyo nga magsaksi sang performance sang mga tribu.