DFA, nagpa-athag sa puno nga online appointment agud makakuha sang passport

Nagdamo ang mga aplikante sa pagkuha sang passport ilabe pa sang nag-epekto subong nga tuig ang 10 ka tuig nga validity gani nga puno ang online appointment.

Pahayag ini ni Assistant Secretary Frank Cimafranca sang Office of the Consular Afffairs sang Department of Foreign Affairs sa interview sang Aksyon Radyo Iloilo kasunod sang mga reklamo nga wala na sang available nga slot sa online application. Suno kay Cimafranca, ginatrabaho nila nga makabukas sang dugang nga consular offices sa mga malls agud madugangan ang ila kapasidad nga magbaton sang applicants sa pagkuha sang passport. Samtang wala pa sang dugang nga consular offices, gindeploy kahapon ni Foreign Affairs Secretary Alan Peter Cayetano ang ‘Passport-on-Wheels’ nga una ginpalibot sa Metro Manila kag i-deploy man sa iban nga lugar sa pungsod.

Nagadugang man suno kay Cimafranca sang appointment slots gani mahimo nga makabisita sa appointment site sang DFA. Nanginwala si Cimafranca nga may sindikato sa puno nga passport appointments. (AGB)