Mga jeepney drivers nga may ruta Jaro-liko kag Tagbak Jaro, nagpamahog nga maga-untat sa pagbiyahe kon indi pagkakason ang mga kiosko sa guwa sang Jaro plaza

Iloilo City — Mauntat na lang sa pagbiyahe ang mga driver sang jeep nga Jaro-liko kag Tagbak Jaro kon indi pagkakason ang mga kiosko sa guwa sang Jaro plaza. Suno kay Iloilo City Loop Alliance of Jeepney Owners and Drivers Association (ICLAJODA) president Boyet Parcon, mangin wala sang pulos ang pagpangabudlay sang mga driver kon pirme short sa arkila kag wala sang may madala nga kuwarta pauli sa ila balay. Suno sa iya, sang nagligad nga semana naglab-ot pa sa 7 tubtub 8 ka trip kada adlaw ang ginahimo sang driver apang 4 na lang ka trip subong umpisa nga ginbutangan sang mga kiosko ang guwa sang Jaro plaza. Magluwas sa mga driver, apektado man ang mga empleyado bangud masami nga late sa trabaho kag mga estudyante nga masami late sa klase. Nagpadala na sang sulat ang ICLAJODA kay Mayor Joe Espinosa nga nagahingyo nga kakason ang mga kiosko sa guwa sang Jaro plaza. (JoMaque)