Rumble sang grupo sang mga lalaki, nagluntad sa isa ka Bar sa San Rafael Mandurriao
Iloilo City — Nakuhaan sang video ang pag rumble sang grupo sang mga lalaki sa Hideout Bar sa San Rafael Mandurriao, alas 2 kaina sang kaagahon. Makita sa video nga nagtapungulay ang mga lalaki kag naghabuyanay pa sang botelya. Suno sa informant sang Aksyon Radyo Iloilo, nagtapungulay ang grupo sang mga lalaki nga nagapungko sa lamesa sa ila likod bangud sa suyaay. Ginpahayag sang informant nga ulihi na naka responde ang mga pulis. Dugang pa niya, wala sang menor de edad nga involved.
Sa verification naman sang Aksyon Radyo Iloilo as of 5:30 pm, wala sang report/ record ang Mandurriao PNP nahanungod sa insidente; apang ginkumpirma naman sang management sang Hideout Bar ang natabo .
Suno kay alyas Tirso, nagpadala sang video kag customer sang bar, gulpi lang nga naghabuyanay sang botelya kag nagsumbaganay ang mga lalaki sa tupad nila nga lamesa. Ginapatihan sinuyaay ang ginhalinan sang gamu. Suno naman kay PCI Juvy Navales, hepe sang Mandurriao Police Station, wala na nagpa-blotter ang mga involved nga pamatan-on agud indi mahibaluan sang ila mga ginikanan. Naghisugot man sila nga aregluhon lang ang gamu. (JoMaque)