Fireworks display sa awarding ceremony sang Dinagyang Festival 2018, wala sang permit suno sa RCSU 6
Iloilo City — Ginpanindugan ni Regional Civil Security Unit (RCSU 6) Section Chief, Senior Inspector Ismael Gandarosa nga wala sang permit ang ginhiwat nga fireworks display sa ibabaw sang Regent Arcade building pagkatapos sang awarding ceremony sang Dinagyang Festival 2018 sa Iloilo Freedom Grandstand. Gin-verify man ni Gandarosa kay RCSU 6 Chief, Senior Supt. Jomil John Trio kon may permit ang fireworks display kag nagpahayag ini nga wala siya sang may ginhatag nga permit.
Nag-issue na sang memorandum si Trio sa iya mga tinawo nga mag-conduct sang investigation kag hibaluon sa Police Station 1 kag Iloilo Dinagyang Foundation Inc., kon sin-o ang nag-sponsor kag nagpahanugot nga maghiwat sang fireworks display.
Base sa Executive Order No. 28 ni Presidente Rodrigo Duterte, kinahanglan ang permit para sa paghiwat sang fireworks display.
Suno naman kay Fire Chief Inspector Christopher Regencia, nakahibalo lang siya matapos gin-inform sang co-organizer sang concert pagkatapos sang Awarding Ceremony nga may fireworks display. Bangud wala siya sang nauyatan nga mga papeles, ginhaum-haum lang ni Regencia nga kabahin ang fireworks display sang mga aktibidad sang Dinagyang gani nagpadala siya sang standby firetruck sa area. Iya ginpahayag nga dapat kuntani, may permit halin sa PNP kag sa ila opisina kag Executive Order ang Local Chief Executive bilang pre-requisite antes ang fireworks display. (JoMaque)