Isa sa tatlo ka suspek sa paghold-up sa taxi driver sa Lapaz, nag-athag nga wala sila sang plano nga patyon ang biktima

Iloilo City–Wala sang plano ang tatlo ka suspek sa paghold-up sa taxi driver sa Lapaz nga patyon ang biktima.

Suno kay Careolo De Guzman, 21-anyos sang General Hughes, City Proper, kuwarta lang ang ila kuhaon sa taxi driver nga si Edgardo Broñosa, 47-anyos. Apang nakibot siya sang ginhandos sang kutsilyo sang iya kaupod nga 15-anyos si Broñosa. Ginpanginwala naman ni De Guzman nga ginpalupok niya ang pugakang nga gintaya sa driver.

Ginpahayag ni De Guzman nga ginbayan niya sa utang nga masobra isa ka libo ang parte sa 3 mil 500 pesos nga nakuha nila kay Broñosa.

Preso si De Guzman sa Lapaz Police Station samtang ara sa kustodiya sang DSWD ang duha ka menor-de-edad niya nga kaupod. (AGB)