Ang istorya sang Iloilo Freedom Grandstand suno kay Historian Demy Sonza
Iloilo City — Ideya ni anay Mayor, Congressman kag Senator Rodolfo ‘Roding’ Ganzon ang Freedom Grandstand. 1953 sang gin-author kag ginsponsor ni Ganzon nga Congressman sadtu ang “Iloilo City Freedom Law” ukon Republic Act 1209 matapos ginpasugtan ang taga-syudad nga magpili sang ila Mayor, Vice Mayor kag Councilors. Si Ganzon ang labing una nga elective Mayor sang 1955 sa diin ginpatindog niya ang grandstand sa Sunburst Park (sa atubang sang Aduana) agud dumdumon ang kinamatarung sang mga taga-syudad sang Iloilo nga nagpili sang ila mga opisyal sang 1955. Antes sini, gina-appoint lang ang mga opisyal sa Iloilo City. Sa gamay nga grandstand nagsumpa si Ganzon, ang iya bise alkalde kag 10 ka Councilors. Madamo man sang dalagku nga programa nga ginhiwat sa Freedom Grandstand pareho sang sentimental journey ni General Douglas MacArthur sang July 10, 1961 kag ang labing una nga Dinagyang Festival sang 1968. Sang 1992, ginparenovate kag ginpadaku ni anay Mayor Mansing Malabor ang grandstand.
Sa katapusan nga semana sang Pebrero subong nga tuig, posible suguran na ang demolition sang Freedom Grandstand agud hatagan ligwa ang restoration sang Sunburst Park samtang isaylo ang bag-o nga Freedom Grandstand sa Muelle Loney sa atubang sang Iloilo River. Nangin emotional kaina si Vice Mayor Jeffrey Ganzon bangud may sentimental value sa ila pamilya ang Freedom Grandstand apang wala siya sang mahimo sa kagustuhan sang mayorya. (JoMaque)