Presyo Sang Bugas Sa Iloilo Terminal Market Kag Iloilo Central Market Nagmahal

Iloilo City – May pagmahal sa presyo sang commercial rice sa Iloilo Terminal Market kag Iloilo Central Market.

Sa paglibot sang Aksyon Radyo reporters, gin-ako sang mga nagabaligya sang bugas ang pagsaka sa presyo sang regular kag premium nga bugas. Ginpahayag nga dyutay na lang ang supply sang regular rice bangud ini ang pinakamabakal.

Halin sa 29 tubtob 32 pesos kada kilo sang una, nagahampang na subong sa 33 tubtob 36 pesos ang kada kilo sang regular rice.

May pagsaka man sa presyo sang premium rice nga halin sa 40 tubtob 41 pesos kada kilo, mabakal na subong sa 43 tubtob 44 pesos. Wala naman sang adjustment sa presyo sang special rice.

Wala naman sang NFA rice nga nakita sa mga merkado. Ginpa-athag kahapon NFA Provincial Manager Erna Abello nga ginlimitahan nila ang supply sa merkado bangud prayoridad nila ang relief operations kag feeding programs sang gobyerno.

(att)