(UPDATE) OWWA officials, liwat nagbisita sa pamilya Demafelis sa Sara
Sara, Iloilo–Nagbisita sa pamilya ni Ilongga OFW Joanna Demafelis sa Barangay Ferraris, Sara ang mga opisyal sang Overseas Workers Welfare Administration ukon OWWA kaina.
Nagapreparar na ang pamilya sa pag-abot sang bangkay ni Joanna buwas sa aga. Nag-abot ang iya bangkay sa Manila halin sa Kuwait kaina sang aga.
Lakip sa nagpadulong sa Sara sanday Josefino Torres nga Deputy Administrator for Administraton and Finance sang OWWA 6; Benny Reyes nga director sang regional operation sang OWWA; kag case officer Jack Arroyo. Nagdala naman si Mr. Joselito Dela Banda, head sang DOLE Iloilo, sang feeds, vitamins kag tatlo ka idik nga livelihood project sa nabilin nga pamilya ni Joanna.
Suno naman sa tiyo ni Joanna nga si Barangay Kagawad Pablo Demafelis, may mga salakyan na nga ginhanda para sa ila pamilya sa pagsugat sa bangkay sa Iloilo Airport. (AGB)