Bus kag 10-wheeler delivery truck nagbunggu-anay; 3 napilasan
Miagao, Iloilo – Nagbungguanay ang air conditioned Ceres bus kag 10 wheeler delivery truck sa Brgy, Mambatad.
Suno kay Chief Inspector Norlan Perante, hepe sang Miagao Police Station, tatlo sa 15 ka pasahero sang bus ang napilasan kasunod sang insidente.
Gindala sa Miagao First Aid Clinic suno kay Perante kanday Florencia Cornel, 77-anyos sang Mandurriao, Chesa Raza, 27-anyos sang Paranaque kag ang pito ka tuig nga bata nga lalaki nga si alyas Liam sang San Joaquin, lunsay tanan may mga menor nga pilas.
Sa imbestigasyon sang pulis, nag-overtake ang bus sa ginasundan nga van apang na alang-alangan sa pagbalik sa lane rason nagbunggo sa nagasugata nga delivery truck.
Ginkustodiya sa Miagao Police Station ang driver sang bus nga si Jay Oberio, 30-anyos sang Mindanao.
Ginkilala ang driver sang delivery truck kay Roger Arquisal, 55-anyos sang Antique.
Magluwas sa insidente, may isa pa gid ka vehicular accident nga nagluntad sa lugar suno kay Pernate may kaangtanan sa Ceres bus.
Ginyudyod sang bus ang motorsiklo ni Freddy Nadua, 25-anyos kag tumandok sang Brgy. Alimodias suno kay Perante.
MaU-turn kuntani ang motorsiklo sang nabungguan sang bus nga ginamaneho ni Junie Dela Cruz, 40-anyos sang Hamtic, Antique.
Gindala sa Miagao First Aid Clinic ang angkas ni Nadua nga senior citizen nga ginkilala kay Conception Fajarillo bangud sang mga menor nga pilas kasunod sang insidente.
Ginkustodiya sa Miagao PS si Dela Cruz. (JoMaque)