Presidente Rodrigo Duterte Liwat Nagpabutyag Sang Hibubun-ot Sa Nadangatan Sang Ilongga OFW Nga Ginpatay Sa Kuwait Sa Iya Pagbisita Sa Hamyang Ni Joanna Demafelis Sa Sara
Sara, Iloilo – Nagbisita si Presidente Rodrigo Duterte sa hamyang ni Joanna Demafelis, ang Ilongga OFW nga nasapwan sa sulod sang freezer sa Kuwait.
Alas-2:50 kahapon sang hapon, nag-abot sa Iloilo International Airport ang eroplano nga ginsakyan ni Presidente Duterte nga gin-abi-abi ni Presidential Assistant for Visayas Michael Dino. Nagsakay sa chopper ang presidente kag naghugpa sa Victorino Salcedo Polytechnic College sa Sara. Alas-3:31 nag-abot ang entourage sang presidente sa balay sang mga Demafelis sa Ferraris, Sara. Matapos nga nagtan-aw sang bangkay sang OFW, nagpakig-istorya si Duterte sa mga ginikanan kag kauturan ni Joanna.
Wala napunggan sang presidente nga liwat magpa-utwas sang hibubun-ot sa natabu kay Demafelis kag sa iban pa nga OFWs nga ginpintasan sa Kuwait. Gin-ako man ni Duterte nga akig gihapon siya sa brutal nga pagpatay kay Demafelis.
Alas-4:05 natapos ang pag-istoryahanay nga ginsundan sang malip-ut nga tiun nga pagsabat sang presidente sa pamangkot sang mga katapo sang media. Nagpangumusta man si Duterte kag nagpakuha sang litrato sa mga tawo nga nagbantay sa guwa sang balay antes nagpadulong sa Camp Hernandez sa Dingle.
(att)