Boat captain patay kag 5 pa pilason sa engkuwentro sang Iloilo Provincial Bantay Dagat Task Force kag ginapatihan illegal nga mga mangingisda sa Concepcion

Iloilo — Duha ka civilian crew kag duha ka pulis sang lloilo Provincial Bantay Dagat ang pilason sa komosyon sang tuyo nga dakpon sang mga ini ang mga crew sang trawl boat nga ginpahayag illegal nga nagapangisda sa kadagatan sang Balidian Island sa Concepcion.

Sa report nga nakalab-ut kay Provincial Administrator Raul Banias, duha ka patrol boats sang Bantay Dagat ang madakup sa trawl apang nagpalagyo. Naabtan sang Bantay Dagat ang fishing boat sa kadagatan sang Sagay, Negros Occidental apang sang tuyo nga magsaka ang apprehending officers, ginpahayag nga ginpanglampusan sila sang pusog kag gintuyo nga agawan sang armas ang pulis. Suno kay Banias, nagbalik sa Concepcion ang Bantay Dagat bangud madamo na ang nag-apas sa tunga sang baybay kag nag-init ang sitwasyon. Gindala sa Sara District Hospital ang mga napilasan nga crew.

Sa interview naman sang Aksyon Radyo Bacolod kay Chief Inspector Robert Mansueto sang Sagay City Police Station, gin-confirmar sini nga napatay bangud sa pagbuno ang boat captain sang FB Gloria nga si Vivencio Espinosa, 40-anyos. Padayon naman nga ginabulong sa Corazon Locsin Montelibano Memorial Regional Hospital sa Bacolod City ang utod sang kapitan nga si Joel Espinosa, 36-anyos. Sa version sang mga ini, ginpalukpan sila sang mga operatiba pag-abot sa Panal Reef, Barangay Old Sagay kag may komosyon matapos may nagsaka nga armado nga mga naka-sibilyan sa trawl boat. Ginahulat pa sang Sagay City police ang paathag sang Iloilo Provincial Dagat kon ano gid ang natabu.