Ilonggo OFW Sa Riyadh Ginreklamo Ang Iya Employer Angut Sa Pagbuhin Sa Iya Sweldo Kag Indi Pagbayad Sang Iya Overtime Work

Riyadh, Saudi Arabia – Nagakabalaka ang Ilonggo Overseas Filipino Worker ukon OFW sa Riyadh, Saudi Arabia sa iya seguridad matapos ginreklamo ang employer angut sa ginabuhin nga balor sa iya sweldo.

Suno sa OFW nga si Reddy Villaruz, tumandok sang North Baluarte, Molo, mil 500 saudi riyal kag food and lodging allowance ang ginpasalig sa iya sang NYD International Placement Agency Corporation antes nagpirma sa iya kontrata.

Nakibot si Villaruz bangud hinali lang siya ginasukot sang 300 saudi riyal sang iya employer kada bulan.

Ginpahayag sang OFW nga waiter man ang gin-applayan niya nga trabaho apang ginhimo nga manugluto sang pagkaun sang baka kag manok sa Riyadh.

Ginpabutyag ni Villaruz nga gusto na niya magpuli apang indi pa magpasugot ang iya employer tubtob nga indi mabayaran sang iya agency ang 20 mil saudi rial nga gingastos sa pagkadto niya sa Riyadh.

Nagdangop na sa Overseas workers welfare administration ukon OWWA si Villaruz.

(att)S