Alleged recruiter Ni Joanna Demafelis Nagsurrender Sa Pulis ; Recruiter Nagpabutyag Nga Nakonsensya Sa Kamatayon Ni Joanna

Manila –  Nagsurrender sa pulis ang Ilongga nga recruiter ni Joanna Demafelis, ang Ilongga OFW nga brutal nga ginpatay sa Kuwait.

Suno kay Agnes Tuballes, kasimaryo ni Joanna sa Brgy. Ferraris, Sara, nagpalapit sa iya ang OFW agud makatrabaho sa iban nga pungsod.

Ginpahayag ni Tuballes nga wala na siya sang may nabatian sa pamilya Demafelis sugod sang nakalakat sa Kuwait si Joanna sang 2014.

Nagsurrender si Tuballes sa Criminal Investigation and Detection Group ukon CIDG agud ma-clear ang iya ngalan sa issue kag maproteheran ang iya pamilya.

Una na naguwa ang ngalan ni Tuballes nga amo ang nag-recruit kag nag-refer kay Joanna sa Our Lady of Mount Carmel Agency.

Nangin emosyonal naman si Tuballes sang ginpresentar sa katapo sang media sa Camp Crame kaina sang aga.

Ginpabutyag ni Tuballes nga nakonsensya siya sa natabo kay Joanna apang nagpahayag nga wala siya nakahibalo rason wala nakabulig sa OFW.

Si Tuballes ang staff sang una sang agency ni Joanna nga Our Lady of Mount Carmel Agency.

Gin-ako naman ni Tuballes nga may contact siya nga Filipino OFW sa Kuwait nga amo ang naga-hire sa ginapasulod niya nga mga OFW sa amo nga agency.

(ATT)