Amay sa Passi City, ginpasakaan sang kaso nga rape sang iya tatlo ka menor-de-edad nga kabataan
Passi City–Ginpasakaan sang kaso ang amay nga ginreklamo nga naghimulos sa iya tatlo ka menor-de-edad nga kabataan sa isa ka barangay sa Passi City.
Suno sa punong barangay sa lugar nga gina-istaran sang mga tagreklamo, ginpasakaan sang kaso ang amay nga barangay tanod matapos positibo nga nagabusong ang 14-anyos sini nga bata. Ginpahayag sang kapitan nga gindala sa ginfile nga kaso ang testimoniya sang duha ka manghud sang nagabusong bisan negatibo ang resulta sa medical examination nga nahimuslan sila. Ginbasehan suno sa punong barangay ang testimoniya sang mga bata nga masobra isa ka tuig na nga ginahimuslan sila sang ila amay.
Nadiskubrihan ang natabu sang ginpamangkot sang maestra ang 13-anyos nga dalagita angut sa sitwasyon sang iya 14-anyos nga magulang bangud masami nga absent.
Natukiban naman sang punong barangay nga tuyo pa nga ipalikaw sang iloy ang tatlo ka kabataan kag indi na magpasaka sang kaso batuk sa iya bana. Suno sa kapitan, ginhambalan niya ang iloy nga kuhaon ang tatlo ka bata kag itugyan sa DSWD kon indi niya pagkasuhan ang iya bana.
At-large ang suspetsado nga amay. (AGB)