Mga tumandok nga ati sa Boracay, nagakabalaka nga ma-apektuhan man kon siraduhan sang gobyerno ang isla bangud sa environmental issues

Boracay Island, Aklan—Ma-apektuhan ang mga tumandok nga ati pananglitan siraduhan sang gobierno ang isla sang Boracay base sa mandu ni Presidente Rodrigo Duterte bangud sang environmental crisis.

Suno kay Ms. Vangie Tamboon, residente sang ati community sa isla, kalabanan sa ila ang nagatrabaho kag nagakuha sang palangabuhian sa mga establisimento. Nagapati si Vangie nga kon magbuligay ang local kag national government, masolusyunan ang problema kag may paglaum pa nga maluwas ang Boracay.

Sobra gid kadaku suno sa iya ang kinalain subong sang Boracay kumparar sadtu. Kon sang una mahimo makalagaw sa palibot sang isla ang mga ati kag puwede makatulog nga wala sang nagasita sa ila, subong indi na puwede bangud may tag-iya na ang mga duta.

Wala naman sila sang may matamnan nga duta bangud halos napatindugan na sang mga buildings.

Ginpahayag ni Vangie nga kon ginasunod lang sang local government ang laye, wala na naglala ang problema. (AGB)