Kolumnista sa local newspaper, gintapungol sang punong barangay sa hotel sa Molo

Iloilo City–Nagreklamo ang kolumnista sa local newspaper nga gintapungol sang punong barangay sa sulod sang Hotel Del Rio sa Molo alas-9:30 kaina sang aga.

Sa reklamo ni Vego nga ginparecord sa Molo Police Station, nagahulat siya sa hotel sang nag-abot si Libertad, Lapuz Punong Barangay Sumakwel Nava kag gulpi siya nga gintapungol sang makaduha ka beses. Nabuka ang antipara ni Vego matapos ginsumbag nga nagresulta sang pagkapilas sa idalum sang iya wala nga mata.

May naghambal man kay Vego nga tuyo magabot sang pusil ang kapitan apang napunggan. Mangayo si Vego sang kopya sang CCTV footage sa hotel agud masiguro kon may pusil gid man si Nava antes magdesisyon sang iya masunod nga himuon.

Nagapati si Vego nga nag-ugat ang tanan sa column niya sa Panay News kahapon nga may tigulo “So what if Treñas is running for mayor?” Nagpost sa iya Facebook account si Councilor Plaridel Nava, bata ni Kapitan Nava, nga may mediaman sa syudad nga nagabaton sang kuwarta halin kay Congressman Treñas kag namitlangan si Vego. Nagapati si Vego nga ginsugiran sang konsehal ang iya amay sang pagsabtanay nila sa FB.

Ginpanindugan naman ni Councilor Nava nga wala sang labot ang iya Facebook post sa natabu. Suno diri, madugay na nga ginapangita sang iya amay si Vego bangud may utang ini sa iya nga kuwarta. Ginpanginwala man sang konsehal nga namitlangan si Vego sa iya post kag nakibot na lang siya sang nag-react ini sa comment section gani nagsabtanay sila. (AGB)