Taga-Jaro nga OFW sa Kuwait, nangayo bulig nga i-repatriate

Iloilo City–Nagpangayo sang bulig ang pamilya sang Ilongga OFW sa Kuwait nga taga-Jaro nga makapuli ini sa Pilipinas matapos nagreklamo nga nadunot ang iya kamot sa sobra nga trabaho kag ginapagutman man sang iya amo.

Suno sa iloy nga si Mayobelle Francisco, isa lang ka hamburger sa isa ka adlaw ang ginakaon sang iya bata nga si Nelmay Francisco kag may tion man nga nagapang-ukay ini sang basura agud makakaon. Isa man ka semana nga wala naka-obra ang iya bata bangud nalupog sang sobra nga pagpangabudlay.

Ginpahayag sang iloy nga apat ka employers ang gin-obrahan sang iya bata antes ini ginbalik sa isa ka agency sa Kuwait. Wala naman sang ideya si Mayobelle kon nagakaon man ang iya bata sa ginatineran sini nga agency.

Napalab-ot na ni Mayobelle sa Overseas Workers Welfare Administration ang sitwasyon sang iya bata sang Marso 5.

Sang nagligad nga tuig lang nagtrabaho sa Kuwait si Francisco. (AGB)