(UPDATE) Bakhaw Punong Barangay Remia Prevendido-Gregori, gintudlo nga nagbaton sang kita halin sa illegal drugs

Iloilo City–Gintudlo si Punong Barangay Remia Prevendido-Gregori nga nakabaton sang kita halin sa illegal drugs. Suno kay Mary May Avelino, 35-anyos sang Cubay, Jaro, nga isa sa mga nadakpan sa buy bust operation sa Jibao-an, Pavia kagab-i, naka-agi sadto nga nakadul-ong siya sang kita sa pagbaligya sang illegal drugs kay PB Gregori.

Gintudlo man ni Avelino si Messy Gregori, bata sang kapitan, nga nagasugod sa iya sa pagbaligya sang illegal nga druga. Ginpahayag ni Avelino nga wala siya sang mahimo bangud kinahanglan niya ang kuwarta kag may kabalaslan siya kay Missy nga nagbayad sa pagpa-ospital sadtu sang iya bata.

Suno naman kay PSI Kennith Bermejo, head sang Regional Drug Enforcement Unit, madamo pa sila sang nakuha nga impormasyon kay Avelino apang indi mabuyagyag subong bangud nagapadayon ang ila imbestigasyon. Nagalaum si Bermejo nga indi lang si Punong Barangay Gregori ang madakpan nila kundi lakip ang iban pa gid nila nga mga himata nga may kaangtanan sa illegal nga druga.

Magluwas kay Avelino, nadakpan man kagab-i sanday Melbert Domatillo, 25-anyos kag alyas Jojo, 16-anyos. (AGB)