Ilongga OFW nga nagreklamo bangud sa sobra-sobra nga ginpa-obra sang iya mga employers sa Kuwait, nakapauli na sa Iloilo

Iloilo City–Nangin emosyonal ang Ilongga OFW nga nagpangayo sang bulig nga makapauli bangud sa sobra-sobra nga ginpa-obra sang iya mga employers sa Kuwait sang nakita na ang iya pamilya sang nag-abot sa Iloilo kaina sang aga.

Naghibi si Nelmay Francisco sang Brgy Manampunay, Leon samtang ginahakos ang iya duha ka mga bata sang nagkit-anay sila sa Tagbak Terminal. Ginsugat si Nelmay sang iya bana nga si Jorge upod ang duha nila ka mga kabataan, iya iloy nga si Mayobelle Francisco kag tiya.

Sang Marso 14 pa nag-abot sa Manila ang OFW apang Ro-Ro vessel ang iya ginsakyan pabalik sa Iloilo.

Nagpasalamat naman si Mayobelle sa Aksyon Radyo Iloilo sa pagbulig facilitate agud makapauli ang iya bata. Una nga ginpalab-ot ni Mayobelle sa Aksyon Radyo nga nadunot ang kamot kag nalupog ang iya bata sa madamo nga trabaho kag ginapagutman sang nagkalain-lain niya nga mga employers. May tiun pa suno sa iya nga nagapangukay sa basurahan si Nelmay para makakaun.

May bulig ang OWWA

Nagpasalig sang bulig ang Overseas Workers Welfare Administration ukon OWWA 6 kay Francisco. Suno kay OWWA 6 spokesperson Jack Arroyo,  tubtob sa P20, 000 nga livelihood assistance ang mahimo mabaton ni Camariosa.

Ginpahayag ni Arroyo nga mas maayo nga makapahuway anay ang OFW nga nakapauli sa Iloilo antes i-proseso ang benepisyo. (AGB)