Sandiganbayan, nagdesisyon nga guilty si San Enrique Mayor Trixie Fernandez sa kaso angut sa GSIS contributions sang pila ka empleyado sang LGU

Nagpagguwa na sang desisyon ang Sandiganbayan sa kaso nga 16 counts sang paglapas sa Section 52 (g) sang The Government Service Insurance Act of 1997 kag 11 counts sang paglapas sa Section 3 (a), Rule 7 in relation to Section 1, Rule 12 sang Implementing Rules and Regulations sang Home Development Mutual Fund Law of 2009 nga ginpasaka batuk kanday San Enrique Mayor Rosario Mediatrix “Trixie” Fernandez kag Imelda Mecisamente Celebrar.

Sa apat ka pahina nga decision sang Second Division sang Sandiganbayan nga pirmado nanday chairperson Oscar Herrera Jr kag Associate Justices Michael Frederick Musngi kag Lorifel Pahimna, ginpamatbatan kanday Fernandez kag Celebrar nga guilty sa kaso.

Nagmandu ang Sandiganbayan sa mga natungdan nga magbayad kada isa sang P5,000 sa kada count sang violation ukon P80,000 sa kabug-usan.

Guilty man ang mga ini sa paglapas sa First Paragraph sang Section 1, Rule 12 sang Implementing Rules and Regulations sang Repuclic Act No. 9679.

Ginpasakaan sang kaso sa Sandiganbayan sanday Fernandez kag Celebrar sang Enero 23, 2017. Una nga nagfile sang not guilty plea ang mga natungdan apang ginbawi nila ini kag naghingyo sang re-arraignment.

Nag-ugat ang reklamo sa wala naremit nga contribution sang pila ka mga empleyado sang Local Government Unit San Enrique sa GSIS matapos nabuyagyag sa Candidates’ Forum sang Aksyon Radyo Iloilo sang 2016. Ginatinguhaan pa sang Aksyon Radyo Iloilo nga makuhaan sang statement sanday Fernandez kag Celebrar. (AGB)