Valedictorian sang PNPA nga taga-Negros Occidental, nagpasalamat sa mga nagbulig agud makatapos siya sa pag-eskwela; magasulod sa SAF

Cavite— Magasulod sa elite nga Special Action Force (SAF) si Cadet Fritz John Napalinga Vallador, tumandok sang Kabankalan, Negros Occidental kag valedictorian sang PNPA Maragtas ukon Magiting at Responsableng Alagad ng Batas na Gagabay sa Transpormasyong Alay sa Bayang Sinilangan Class of 2018.

Suno sa nagserbe guardian ni Vallador nga si Nelia Diocares, nagmandu na si PNP Chief Director General Ronald De la Rosa nga maghanas ang iya hinablos sa SAF.

Si Vallador ang nagpanguna sa 106 ka kadete sang Maragtas Class sa ila graduation subong nga adlaw. Nagbaton ini sang Presidential Kampilan Award kag Plaque Merit halin kay President Rodrigo Duterte, kag Kampilan Award halin kay Dela Rosa sa graduation rites sa Camp Castaneda sa Silang, Cavite.

Si Vallador, 24, nabun-ag kag nagdaku sa iya mga himata kag ginpa-eskwela ni Diocares. Wala sini nakilala ang iya amay samtang ang iloy sini nagatrabaho bilang domestic helper sa Spain. Wala naman naka-abot ang iya iloy sa iya graduation bangud wala ginpasugtan sang amo sini.

Sa iya valedictory speech, isa-isa nga ginpasalamatan ni Vallador ang mga nagbulig sa iya kag  ginbalikan man ang iya nangin kabuhi kag kabudlay nga inagyan sang gamay pa siya. (AGB)