Mga luyag magsulod sa PMA, dapat mentally kag physically prepared–2nd Lieutenant Jaywardene Hontoria

Iloilo City–Ginpasidunggan sang local government unit sang Pavia si 2^nd Lieutenant Jaywardene Hontoria sang Sitio Linao, Barangay Balabag, Pavia nga baron kag valedictorian sang PMA Class 2018.

Sa flag-raising ceremony kaina sang aga , ginhatag ni Mayor Mike Gorriceta ang plaque nga nagakilala sang gindala nga bugal ni Hontoria sa mga Pavianhon kag sa bilog nga probinsya. Ginhatag man kay Hontoria ang Resolution of Commendation nga ginpasar sang Sangguniang Bayan.

Pagkatapos nga ginkilala sa iya banwa, nag-courtesy call si 2^nd Lieutenant Hontoria kay Governor Arthur Defensor. Upod sini nga nagpadulong sa opisina sang gobernador ang iya asawa nga si Loura Fe kag si Balabag, Pavia Punong Barangay Ariel Gerada. Nagpasar man ang Sangguniang Panlalawigan sang resolution nga nagakilala sa kadalag-an sang Ilonggo PMAer.

Ginlaygayan naman ni Hontoria ang mga pamatan-on nga luyag magsulod sa PMA nga ipreparar ang kaugalingon mentally kag physically agud malampuwasan ang mga kabudlayan sa sulod sang academy bangud ini man ang iya attitude nga gin-adoptar.

Ginpili naman sini nga magsulod sa Philippine Marines bangud naanad siya sa pangabudlay bilang bata sang mangunguma. Ang Marines suno sa iya ang ginapadala sa front line kag sa mga lugar nga indi malab-ut sang basic services. (AGB)