(UPDATE) Duha sa apat ka CAFGU members nga napilasan sa pagpangtiro sang soldado sa Maasin, nakaguwa na sa ospital; asawa sang napatay nga CAFGU member, desidido nga magpasaka sang kaso

Maasin, Iloilo–Nakaguwa na sa ospital ang duha sa apat ka mga CAFGU members nga napilasan sa pagpangluthang sang suldado sa Barangay Panalian, Maasin kahapon sang kaagahon.

Nakaguwa kahapon sa Western Visayas Medical Center ang magpakaisa nga Aljun Magarse kag Michael Magarse matapos nga nakibyasan sa insidente. Padayon naman nga confine sa ospital ang tiyo nga si Juan Magarse kag isa pa ka upod nga si Jorge Cabilayan sang Alimodian.

Nagapabilin nga preso sa Maasin Police Station si Philippine Army Staff Sergeant Alvin Estorco matapos ginturn-over sang iya battalion commander upod ang iya issued firearm. Si Estorco ang detachment commander sang 2^nd Platoon 13^th Iloilo CAFGU Active Auxiliary Company sang Philippine Army sa Barangay Panalian.

Sa imbestigasyon sang Maasin police, nasal-an ni Estorco nga mga kontra ang iya mga CAFGU members samtang nagapauli halin sa pagbantay sa baylehan sa Barangay Ubian. Suno kay Senior Inspector Felix Allanza Jr, hepe sang Maasin Police Station, hubog si Estorco sang natabu ang pagpangluthang.

Patay sang nag-abot sa ospital ang CAFGU member nga si Albert Magarse, 28 anyos sang Barangay Panalian. Desidido naman si Rosanie Consomo, live-in partner ni Albert nga magfile sang kaso batuk kay Estorco. (AGB)