Resolution nanday Councilors Joshua Alim kag Plaridel Nava nga nagabawi sang ila suporta sa ordinansa nga naghatag sang franchise sa South Balibago Water Resources, wala ginsuportahan sang konseho

Iloilo City–Wala napasar sa City Council ang resolution nanday Councilors Plaridel Nava kag Joshua Alim nga naga-withdraw sang ila suporta sa ordinansa nga naghatag sang franchise sa South Balibago Water Resources, Incorporated.

Ini bangud sa 11 ka nagtambung sa session kaina, sanday Alim, Nava kag Councilor Armand Parcon lang ang nagpabor. Nagpamatuk naman si Councilor R. Leone Gerochi, nag-abstain sanday Councilors Ely Estante, Ed Peñaredondo, Reyland Hervias, Liezl Salazar, Mandrie Malabor kag Jay Treñas samtang wala nagboto si Councilor Love Baronda.

Desisyunan pa sa masunod nga session kon ano ang matabu sa resolution kasunod sang ginfile nga motion for reconsideration ni Nava sa ruling ni Councilor Candice Tupas, nagpungko nga presiding officer, nga napierde sila sa pagpasar sang resolution. (AGB)