Asawa kag mga bata sang retirado nga pulis nga suspek sa pagtiro sa mag-amay nga nagpatay sang bata, nangindulaan na sa Bolilao, Mandurriao

Iloilo City–(UPDATE) Nangindulaan sa Sitio Sooc, Brgy. Bolilao mandurriao ang asawa kag mga bata ni retired SPO1 Ariel Acopicop matapos ang pagpangtiro sini sa mag-amay nga Ariate kahapon.

Suno kay JR, 19-anyos kag isa sa mga bata ni Joseph Ariate, wala na sa ila balay ang pamilya sang retirado nga pulis matapos man nga nagpalagyo ang suspetsado. Desidido suno sa iya nga mag-file sang kaso ang ila pamilya kon mag-abot ang iya iloy halin sa Hongkong.

Ginsugid ni JR nga gintiro man siya ni Acopicop matapos ini nga nagsulod sa ila balay kag ginpangtiro ang iya amay kag magulang nga si Jorem.

Nagatindog sa atubang sang tyangge si JR sang nakita niya ang pagtiro sang pulis sa iya amay kag utod. Gin-athag ni JR nga wala sila sang dumot sa pulis kag sa pamilya sini bisan pa nga ginabuyayaw kag ginapaukpan sila sa tion nga mahubog  kag mag-away sila sang iya asawa.

Napatay si Jorem bangud sang pilas sa dughan, kamot kag sulok-sulok samtang pilason kag padayon nga ginabulong sa ospital ang amay sini nga si Joseph nga napilasan sa paa. (AGB)