Tag-iya sang salakyan nga nagdul-ong sa ospital sa gintudlo nagpatay kay Lonoy, Calinog PB Eustaquio Porras, nakilala na sang police
Sta. Barbara, Iloilo – Nakilala na sang Iloilo Police Provincial Office ang tag-iya sang salakyan nga nagdul-ong sa ospital sa gintudlo nagtiro patay kay Lonoy, Calinog Punong Barangay Eustaquio Porras sang nagligad nga semana.
Gin-confirmar ni IPPO Director PSSUPT Marlon Tayaba nga nagpadulong sa ila opisina si Mr. Eugene Franco kag nag-ako nga ginapanag-iyahan sang ila family company nga SCAFF ang Mitsubishi Strada nga nagdul-ong kay Ronald Llupar alyas Ka Isidro, 34-anyos sang Bag-ong Barrio, Tapaz, Capiz, sa QualiMed Hospital. Si Llupar ang ginpahayag sang IPPO nga NPA member.
Sa pag-interview ni Tayaba kay Franco, gintawgan lang siya sang caretaker sang ila banana plantation sa Tapaz, Capiz nga nagapangayo sang bulig si Ondoy Llupar, amay ni Ronald, bangud ginpahayag nga napilasan sa accidental firing ang iya bata. Ginpasugat ni Franco sa ila driver nga si Ramon si Ronald sa terminal sa Poblacion, Janiuay.
Naghingyo suno kay Franco si Ronald nga dal-on siya sa pribado nga ospital gani gindiretso sa QualiMed Hospital. Ang ospital amo ang nag-inform sa Mandurriao police nga may pasyente sila nga may pilas sang pagkatiro gani ginrespondehan kag natukiban nga isa ini sa duha ka suspek sa pagpatay sa barangay kapitan sa Calinog. Lain pa nga pangalan ang gingamit ni Ronald pero natukiban ang iya matuod nga pangalan sa pag-imbestigar sang IPPO.
Ginapadalman sang mga pulis ang development sa kaso suno pa kay Tayaba. (JoMaque)
—