Jail Warden sang BJMP-Pototan, nag-sorry sa pagpasulod sang Ipad sang inmate sa selda
Pototan, Iloilo — Gin-ako ni BJMP-Nanga, Pototan Jailwarden John Montero nga ginpasugtan nila nga makagamit sang Ipad sa sulod sang prisuhan ang inmate nga si anay Rizal, Lapaz Punong Barangay Jolly Peñasales.
Suno kay Montero, nag-ayo si Peñasales nga makagamit sang Ipad kag makahampang sang Candy Crush bangud indi ini makatulog.
Nag-sorry si Montero kun sala man ang iya nangin desisyon kag nagpabutyag sang kahanda nga magbaton sang mangin aksyon sang BJMP Regional Office batok sa iya.
Ang pahayag ginhimo ni Montero kasunod sang ginhimo nga surprise greyhound inspection sa diin narecover ang madamo nga mga kontrabando.
Napreso si Peñasales matapos ini nadakpan sa buybust operation sang Agosto, 2017. (JoMaque)