Senior citizen, gindakup matapos ginreklamo nga naghimulos sa iya 15-anyos nga hinablos nga ginpahayag may deperensya sa paminsaron

Iloilo–Nagreklamo ang 15-anyos nga special child sa iya iloy na ginhimuslan siya sang senior citizen niya nga tiyo sa isa ka banwa sa probinsya.

Suno sa Women and Children’s Protection Desk personnel sang natungdan nga police station sa probinsya, nakibot ang iloy nga si alyas Melody sang nakita nga wala na sang pang-idalum nga panapton ang iya bata nga si alyas Joy sang nakita niya sa kwarto sang ila balay. Una nga nasugata ni Melody suno sa pulis ang 69-anyos nga suspect nga si alyas Greg nga naghalin sa kwarto.

Gilayon nga nagreport sa mga pulis ang iloy  kag ginpaidalum sa medical examination si Joy. Base sa resulta, positibo nga may pilas sa kinatawo ang dalagita.

Natabu ang insidente sang Abril 30 apang sang Mayo 5 lang nagdesisyon ang pamilya ni Joy nga ipadakop ang suspect.

Suno sa WCPD personnel, nakita kag nabatian sang tiya sang dalagita nga ginpamangkot sang suspect si Joy kun puwede ini makahalok liwat sa iya. Nagduda ang tiya sang nakita nga todo sa pagpamalibad si Joy kay Greg.

Preso ang suspect kag natalana pasakaan sang child abuse kag rape.

Ginpa-idalum na sa psychological intervention sang pulis kag Department of Social Welfare and Development ukon DSWD ang dalagita. (AGB)