Board Member Manny Gallar, nagpa-athag kon ngaa nagalagaw sa kabaranggayan sa Cabatuan; Mayor Ronilo Caspe, nanginwala nga ginamalisyahan ang ginahimo sang board member
Cabatuan, Iloilo–Normal lang para kay 3rd District Board Member Manny Gallar ang paglagaw sa kabarangayan sa Cabatuan bilang kabahin sang iya pagserbisyo sa banwa.
Ini ang depensa ni Gallar matapos naguwa ang report nga gina-malisyahan ni Cabatuan Mayor Ronilo Caspe ang paglagaw niya sa mga barangay sa pagpati nga may plano siya nga magpadalagan sa pagka-mayor sa banwa sa masunod nga eleksyon.
Suno kay Gallar, madamu ang nakahibalo nga wala pa siya sa politika, masami siya makita sa pila ka mga barangay sa Cabatuan ilabe na sa mga namatyan. Sa subong suno kay Gallar, wala pa siya makadesisyon para sa 2019 bangud prayoridad niya ang public service.
Ginpanghiwala naman ni Mayor Ccaspe nga ginamalisyahan niya ang ginahimo ni Gallar.
Suno sa alkalde, responsibilidad ni gallar ang maglibot sa banwa nga iya gina-istaran kag maghatag sang anuman nga proyekto sa mga barangay. Ginpahayag ni Caspe nga bukas ang banwa para sa sin-o man may plano nga magpadalagan sa 2019 elections. (AGB)