Tul-an nga nasapwan sa water purifying tank sa Hwaseong City South Korea, kumpirmado nga iya sang Ilonggo OFW nga tumandok sang Cabatuan

Iloilo — Confirmado nga ang Ilonggo OFW nga si Angelo Claveria, 34 anyos sang Cabatuan, ang tul-an nga nasapwan sa water purifying tank sa Hwaseong City, Gyeonggi province, South Korea.

Suno kay Mayet Claveria nga magulang ni Angelo, ginpahibalo sila sang representative sang Korean Consulate sa Cebu nga nag-match ang DNA sample nga ginkuha sa ila iloy sa samples nga nakuha sa tul-an. Base sa impormasyon, ginpatay si Angelo paagi sa paglampus sa ulo.

Agosto 2014 sang nagtrabaho sa South Korea si Angelo kag nagbakasyon sang Setyembre 2015. Disyembre 27, 2015 ang katapusan nga Facebook post ni Angelo sang mga litrato sini nga may kaupod nga duha ka lalaki kag may caption nga ‘Tagay’ samtang sang Enero 3, 2016, gin-ilisan pa ang profile picture sang Facebook account sini. Pero nagduda ang pamilya bangud may samo na nga Tagalog ang sabat kon i-chat nila si Angelo tubtob nga wala na sang ulihi nagasabat sa ila.

Abril 3 subong nga tuig sang ginreport sa Korean Times nga may nasapwan nga tul-an samtang sang Abril 30 naman sang nagpadulong sa Cabatuan ang representatives sang Korean Consulate kag nagkuha sang DNA sample sang iloy ni Angelo.

‘Hustisya para kay Angelo’

Hustisya ang ginasinggit sang pamilya sang Ilonggo OFW nga tul-an na sang nasapwan sa water purifying tank sa South Korea.

Suno kay Mayet,  at-large ang mga suspek sa krimen. Ginpahibalo suno sa iya sang Korean Consulate nga halin sa apat, may isa ka ginatutukan ang mga pulis sa South Korea amo ang nagpatay kay Angelo. Filipino ang suspek sang pamilya sa natabu.

Duha ka tuig man nga ginpangita sang iya pamilya si Angelo matapos wala na nagpauli kag nagasabat kon i-chat nila sa Facebook messenger. Disyembre 2015 ang nakita nga katapusan nga post ni Angelo sa Facebook kag naga-like pa ini sa iban nga posts sang 2016 suno kay Mayet. Apang nagduda ang pamilya matapos may samo na nga Tagalog ang mga sabat sini sa chat tubtob nga wala na gid nagabalos sang ulihi. Ginpahayag ni Mayet nga Karay-a ang gamit ni Angelo kon mag-istorya sa ila.  Na-confirmar nga si Angelo ang tul-an matapos nag-match ang DNA test sa iya iloy. (JoMaque)