Apat ka pulis kag apat ka miembro sang Galindez guns-for-hire group, pilason sa engkwentro sa Cauayan, Negros Occidental

Negros Occidental–Naka-engkwento sang mga miebro sang Mobile Force Company sang Negros Occidental Police Provincial Office (NOPPO) kag ginapatihan gun-for-hire group sa Hacienda Isabel, Sitio Matab-ang, Brgy. Masaling, Cauayan, Negros Occidental kaina sang kaagahon.

Suno kay PINSP Charmae de Paz, public information officer sang NOPPO, maserbe kuntani sang search warrant angut sa loose firearms kag warrant of arrest ang kapulisan sang natabu ang engkuwentro.

Una nga nagpalupok ang miembro sang gun-for-hire group gani nagbalos ang mga pulis. Subject  sang search warrants angut sa illegal possession of firearms sanday Rodel Taquiso kag Salem Teodolo kag si Rodante Lontoc nga ginatudlo leader sang Galindez gun-for-hire group kag ginakabig nga most wanted person sa national level.

Apat ka pulis ang napilasan nga amu sanday PO3 Reynaldo Bawden Jr; PO2 Rolando Prieto; SPO2 Bryan Tabon; kag PO1 Gary Norico. Yara na sa estable nga kondisyon ang mga napilasan nga ginsaylo sa Bacolod City Hospital.

Apat man ang pilason sa miembro sang Galindez group nga padayon nga ginabulong sa Mother of Mercy Hospital sa Kabankalan City.

12 ang arestado lakip na ang apat ka napilasan. At-large naman si Lontoc.

Narecover sang kapulisan ang tatlo ka 12 guage shotgun, .38 caliber revolver, .45 calibre, fragmentation grenade kag mga assorted ammunition. (AGB)