Pamilya sang Ilonggo OFW nga nasapwan ang tul-an sa water purifying tank sa South Korea, nagalaum nga mabalik sa Pilipinas ang iya bangkay

Iloilo City — Nagalaum ang pamilya ni Ilonggo OFW Angelo Claveria nga mapabalik na ang tul-an sini sa Iloilo halin sa South Korea sa labing madali nga tiun.

Suno kay Mayet Claveria, magulang ni Angelo, natapos nila kahapon ang mga ginarequire sang embahada sang South Korea agud ma-repatriate ang tul-an sang OFW. Nagpromisa suno sa iya ang OWWA nga sila na ang masabat sa repatriation fee sang mga tul-an.

Antes sini, nagpadulong ang pamilya Claveria kay Governor Arthur Defensor kag nagpangayo sang bulig para sa madasig nga pagpabalik sang mga tul-an ni Angelo.

Nasapwan ang tul-an ni Angelo sa water purifying tank sa Hwaseong City, Gyeonggi province, South Korea sang Abril subong nga tuig. Naconfirmar nga si Angelo ang tul-an matapos nagmatch ang DNA sample nga ginkuha sa iya iloy kag sa sample halin sa tul-an.

Disyembre 2015 ang katapusan nga communication sang iya pamilya kay Angelo kag ginapatihan nga ginpatay ini sang 2016. May mga suspek na nga ginasundan ang South Korean police. (JoMaque)