Brigada Eskwela bilang preparasyon sa pagbukas sang klase, hiwaton sa masunod nga semana

Iloilo City–Magahiwat sang Brigada Eskwela ang Department of Education halin Mayo 28 tubtub Hunyo 2.

Ini ang ginpahibalo ni Ms. Lea Belleza, Information Officer sang DepEd 6 sa tuyo nga mapreparar ang mga eskuwelahan sa pagbukas sang klase sa Hunyo 4.  Hiwaton naman suno kay Belleza ang regional kick-off sang Brigada Eskwela sa Biernes, Mayo 25 sa Sipalay City, Negros Occidental.

Antes pa ang Brigada Eskuwela, ginpahayag ni Belleza nga nagahiwat na ang DepEd sang pila ka aktibidad bilang preparasyon sa pagbukas sang klase pareho sang early registration sang Pebrero, on-service training sang mga maestra kag hiring of teachers.

Gin-engganyo ni Belleza ang mga education stakeholders nga magpasakup kag magbulig sa pagtinlo kag pagpatahum sang mga eskuwelahan agud ipreparar sa pagbukas sang klase. (AGB)