Bangud sang pustahanay sa NBA Finals, hinablos sang mayor sa Libertad, Antique, ginreklamo nga nagpanaya sang pusil
Antique — Ginreklamo ang hinablos sang alkalde sang Libertad nga nagpanaya sang pusil may kaangtanan sa pustahanay sa hampang sang Golden State Warriors kag Cleveland Cavaliers sa Game 1 sang NBA Finals.
Suno kay Senior Inspector Bryan Alamo, hepe sang Libertad Police Station, nagreklamo si Arnold Sabando sang Centro Este, Libertad nga gintayaan siya sang pusil ni alyas Bogo, hinablos ni Libertad Mayor Mary Jean Te bangud wala sila nag intiendehanay sa pustahanay.
Plus 5 ang kondisyon sa pustahanay sa game 1 pabor sa Warriors apang nagpatas ang hampang. Bangud sini, nagapati si alyas Bogo nga siya ang nagda-og sa ila pustahanay ni Sabando.
Nagapati naman si Sabando nga siya ang nagda-og bangud nag-abanse sang 10 ka puntos ang Warriors sa overtime game kabangdanan nga wala ginbayaran si alyas Bogo.
Gina negusyar ni Alamo si Mayor Te agud i-surrender ni alyas Bogo ang iya pusil. (JoMaque)