Mga contractors sa gina-obra nga karsada sa syudad, nanindugan nga indi sila kulang sa equipment kag mga tinawo
Iloilo City — Wala bisan isa ka contractor sang mga delay nga road projects sa syudad ang nagrason nga kulang sila sa kagamitan ukon tinawo.
Sa meeting nga ginpatawag ni Engr. Rodney Gustilo, head sang DPWH Iloilo City District Engineering Office, sa pito ka contractors kahapon, ginrason nga nagatuga sang delay ang pagpugok sang trapiko, illegal parking, poste sang PECO kag mga tubo sang tubig sang MIWD.
Suno kay Mr. Jim Arcenio Jr sang J. Cordon Construction, may nagakaigo sila nga numero sang mga tawo kag equipment nga kinahanglan sa trabaho.
Ginpanindugan man ni Mr. Jorge Jaruda Jr sang JHJ Construction nga may bastante sila nga tinawo kag kagamitan. Duha ka proyekto nga gina-uyatan sang JHJ Construction ang ginrekomendar sang DPWH ICDEO nga i-terminate ang kontrata; ang pagpa-konkreto sang karsada sa Timawa Avenue nga may -69.7% slippage kag rehabilitasyon sang concrete road sa Bario Obrero, Lapuz nga may -62.87% slippage. Isa pa ka ginrekomendar nga i-terminate ang kontrata sang Legacy Construction sa San Juan, Molo nga may -43.77% slippage. (JoMaque)