Mga contractors sang mga dalan sa syudad nga delay ang pagkay-o, nagapalusot lang suno kay PSTMO Head Jeck Conlu matapos ginbasol ang iya opisina nga wala nagabulig rason sang mahinay nga trabaho

Iloilo City–Nagapalusot lang ang mga contractors sang ginakay-o nga mga dalan sa syudad nga nagbasol sa Public Safety and Transportation Management Office nga wala sila ginabuligan gani delay ang ila pag-obra.

Suno kay PSTMO Head Jeck Conlu, sa bidding pa lang sang proyekto, nahibaluan na sang mga contractors nga karsada ang ila kay-uhon kag indi runway gani dapat napanan-aw sang mga ini nga may pagpugok sang trapiko. Dapat ginatun-an suno sa iya sang mga contractors ang sitwasyon sang karsada nga ila kay-uhon agud ma-address ang mangin problema samtang gina-obra ang proyekto.

Ginpahayag ni Conlu nga antes ang summer, nagsapol siya sa mga contractors kag ginpamangkot kon anu ang ila kinahanglan. Nanindugan si Conlu nga ginhatag sang PSTMO ang request sang mga contractors sa kondisyon nga dasigon ang ila trabaho kag tapuson antes ang pagbukas sang klase.

Apang sa paglibot ni Conlu sa mga on-going road projects, natalupangdan niya nga diutay lang ang tawo nga naga-obra kag kulang pa ang equipment sang pila ka contractors. (AGB)