Mga contractors sang road projects sa syudad, ginpatawag ni PSTMO Head Jeck Conlu sa iya opisina agud mahambalan ang ila mga problema samtang ginakay-o ang karsada
Iloilo City — Ginapakadto ni Public Safety and Transportaton Management Office Head Jeck Conlu subong nga semana sa iya opisina ang mga contractors sang road projects sa syudad agud maistoryahan ang ila mga problema samtang nagakay-o sang karsada.
Nahambalan na ni Conlu si DPWH Iloilo City District Engineering Office Head Engr. Rodney Gustilo angut sa imbitasyon sa mga contractors nga una na nagbasol sa gutok nga trapiko nga isa sa mga rason sang ila mahinay nga trabaho.
Sa pagpati ni Conlu, wala nagkulang ang PSTMO sa paghatag sa request sang mga contractors agud mapadasig ang pagtapos sang mga proyekto.
Apang may mga requests nga road closure nga indi gilayon maaktuhan sang syudad bangud madamo sang ginakonsiderar.
Nagapalusot na lang suno kay Conlu ang mga contractors sa ila kapaltahan kag ginabasol sa pagpugok sang trapiko ang atrasado nila nga trabaho. (JoMaque)