Malasakit Center sa Western Medical Center, ginbuksan para sa mga pasyente sa ospital

Iloilo City — Ginbuksan ang Malasakit Center sa Western Visayas Medical Center, ang labing una nga one-stop shop sa rehiyon para sa mga out patients kag mga pasyente sang amo nga ospital.

Suno kay Presidential Adviser for Visayas Jane Javellana, nahuman ang Malasakit Center sa pagtinguha ni Presidential Assistant for the Visayas Michael Dino. Nangin dinapit nga bisita sa launching si Special Assistant to the President Christopher ‘Bong’ Go kadungan sa pag-abot ni Presidente Rodrigo Duterte kahapon.

Sa Malasakit Center suno kay Javellana, may lamesa ang PhilHealth, DSWD kag PCSO kag social worker sang Department of Health agud magbulig sa mga pasyente sa pagproseso sang ila kinahanglan lakip ang financial kag medical assistance.

Nagalaum naman si Javellana nga mabutangan man sang Malasakit Center ang iban pa nga DOH hospital sa Western Visayas. (JoMaque)