Preso nga napatay sa sulod sang presuhan sa Quezon City, tumandok sang Concepcion, Iloilo; duha ka inmates nga gintudlo nagkastigo sa biktima, kasuhan sang police

Concepcion, Iloilo–Tumandok sang Concepcion, Iloilo ang napatay sa sulod sang presuhan sa Quezon City sang nagligad nga semana.

Suno kay Bagongon Punong Barangay Michael Villaruz, residente nila si Genesis Argoncillo alyas Tisoy, 25-anyos. Nagatrabaho suno kay Villaruz nga pintor sang mga salakyan kag buildings si Argoncillo.

Si Argoncillo ang ikatatlo sa 11 ka mag-utod.

Suno sa Quezon City police, gin-aresto si Argoncillo bangud sang alarm and scandal matapos sila nakabaton sang reklamo nga hubog ini kag nagapangita sang gamo sa Area 5B, Barangay Sauyo, Novaliches, Quezon City.

Nagapati naman ang pamilya ni Argoncillo nga ginkastigo ang ila himata samtang napreso nga nagresulta sang iya kamatayon sang Hunyo 19.

Una nga ginpanginwala sang mga pulis ang akusasyon kag nanindugan nga nga napatay si Argoncillo matapos nagreklamo nga indi makaginhawa. Apang sa press conference kaina sang aga, ginpahayag ni Chief Supt Joselito Esquivel Jr, director sang Quezon City Police Office, nga kasuhan nila sang murder ang duha ka kaupod nga inmates ni Argoncillo nga sanday Richard Bautista kag Justin Mercado nga gintudlo nagkastigo sa napatay. (AGB)