Outgoing Punong Barangay Ray Rico sang PHHC Block 22 Mandurriao, nagpakatig-a nga magpanaug sa puwesto bisan tapos na ang iya nga termino; ginsiraduhan pa ang barangay hall

Iloilo City–Nagapakatig-a nga magpanaug sa puwesto si outgoing Punong Barangay Ray Rico sang PHHC Block 22, Mandurriao bisan napierde sa Barangay kag Sangguniang Kabataan Elections batuk kay newly-elected Punong Barangay Robert Dolar.

Ginpahayag nga ginpanindugan ni Rico nga wala pa nasolbar sang Commission on Elections ang iya gin-file nga petition batuk kay Dolar nga nagakuwestyun sa residency sini. Ginsiraduhan ang barangay hall kag sang ginkadtuan sang Aksyon Radyo, wala man si Rico kaina sang aga.

Nagtakup na alas 12 kaina sang udto ang termino ni Rico kag nagsugod naman ang termino ni Dolar bilang bag-o nga punong barangay.

Naghirinugyaw naman ang mga newly-elected barangay officials kag mga supporters ni Dolar matapos nabuksan ang barangay hall pasado alas-4 kaina sang hapon.

Nangayo si Dolar sang police assistance agud nga mabuksan ang barangay hall bangud wala man nagpakita kahapon si Rico para sa turnover ceremony. Gilayon nga naghimo sang inventory ang mga barangay officials sang mga kagamitan sa sulod sang barangay hall. Naghiwat man sila sang inaugural session para sa una nga adlaw sang ila termino. (AGB)