(UPDATE) GSIS-Iloilo Branch Manager, nagpanindugan nga wala sila nagkulang sa pagpahibalo sa mga pensioners nga magpa-revalidate sang ila account

Iloilo City–Nagpanindugan si Government Service Insurance System-Iloilo Branch Manager Ms. Ma. Vilma Fuentes nga wala sila nagkulang sa pagpahibalo angut sa Annual Pensioner Information Revalidation sang mga pensioners.

Kasunod ini sang pagreklamo sang pila ka pensioners nga ulihi na nakahibalo sa revalidation sang ila account.

Suno kay Fuentes, Pebrero pa lang may announcement na ang GSIS paagi sa Corporate Communication Office sa national radio kag TV angut sa APIR.

Sa local level naman, may programa ang GSIS sa PTV4 kag sa Radyo ng Bayan agud magpahibalo sang mga aktibidad sang ahensya.

Magluwas sini, nakapaguwa man ang GSIS sang announcement sa print media subong man pagbutang sang advertisement sa mga GSIS Wireless Automated Processing System ukon G-WAPS sa syudad kag pila ka probinsya sa Iloilo.

Bisan ang mga sattelite offices kag branches sang GSIS ang nagapaskil man sang posters suno kay Fuentes. Gin-athag ni Fuentes nga wala na siya nakahibalo kon anu ang natabu sa announcement sa Iloilo bangud Hunyo 4 lang siya nag-take over.

Ginpahayag sini nga naglagas pa sila sa deadline sang nag-abot siya sa Iloilo agud ma-inform ang mga pensioners bangud 6 tubtub 7 ka libo pa ka pensioners ang wala kaparevalidate. (AGB)