Negosyante sang itlog pugo nga gintiro patay sa Iloilo Terminal Market kaina sang aga, wala sang malain nga record suno sa police; riding-in-tandem nga suspek, wala pa nakilala

Iloilo City–Wala sang malain nga record ang negosyante sang itlog pugo nga gintiro-patay sang riding-in-tandem sa Iloilo Terminal Market sa Brgy. Rizal Pala – Pala II, City Proper kaina sang aga.

Suno kay Senior Inspector Hermogenes Eulatic, hepe sang Tigbauan Police Station, wala man sa ila drug watchlist ang biktima nga si Ranny Bibanco, 33-anyos, sang Trance Street, Brgy. 2 sa amo nga banwa.

Apang gin-ako ni Eulatic nga gin-istorya niya ang biktima agud hingyuon sa pakaisa sini nga si Jemark Bibanco nga magsurrender sa mga pulis. Si Jemark suno kay Eulatic ang ginakabig high value target drug personality sa Tigbauan.

Gin-athag naman ni Eulatic nga nagakadto sadto sa police station ang biktima bangud may transaction sa iya personnel sa pagnegosyo sang itlog pugo.

Nagapungko sa baligyaan sang saging sa guwa sang terminal market ang biktima sang ginpalapitan sang suspek kag gintiro base sa imbestigasyon sang Police Station 1.

Nagpalagyo ang suspect angkas sa motorsiklo. (AGB)