Pagtukod sang pribado nga pantalan sa Ingore, Lapaz, wala nag-agi sa konsultasyon suno sa anay punong barangay

Iloilo City–Ginareklamo sang mga pumuluyo sa Barangay Ingore, Lapaz ang pribado nga pantalan nga gintukod sang La Filipina Uygongco sa ila lugar.

Suno kay anay Punong Barangay Ernie Porral, wala nag-agi sa public hearing ukon consultation ang pagpatukod sang pantalan nga nagsugod sa pag-operate sang 2016.

Magluwas sini, ginawangal man sang mga pumuluyo ang gahod nga ginatuga sang mga trucks nga nagakarga sang cargoes halin sa nagadungka nga barko kag nagalabay sa barangay road pakadtu sa bodega sang La Filipina Uygongco sa Lapuz.

Ginpahayag ni Porral nga istorbo sa katulugon sang mga pumuluyo kon gab-i tubtub kaagahon ang paglabay sang mga dalagko nga trucks sa barangay road nga para lang kuntani sa mga light vehicles.  Ginreklamo na sang mga pumuluyo sa Department of Environment and Natural Resources nga wala nag-agi sa public hearing ang miscellaneous lease agreement ukon MLA sang La Filipina Uygongco.

Wala pa sang sabat tubtub subong ang DENR sa reklamo apang nakalab-ot ini sa atensyon sang City Council suno kay Porral. (AGB)