MIWD Nagpasaka Sang Kaso Batuk Kay Mayor Joe Espinosa Matapos Siya Nag-Appoint Sang Bag-o Nga Board of Directors

Iloilo City — Ginpasakaan sang Metro Iloilo Water District sang kaso kriminal kag administratibo si Mayor Joe Espinosa.

Nag-ugat ini suno kay Atty. Roy Villa, legal officer sang MIWD, sa pag-appoint ni Espinosa sang mga miembro sang Board of Directors nga iya ginsumiter sa Local Water Utilities Administration. Ini bisan wala pa natapos ang termino kag wala man sang napahalin nga miembro sang Board nga nagapungko subong kag gin-appoint ni Governor Arthur Defensor.

Duha ka counts sang Usurpation of Official Functions kag Graft and Corrupt Practice ang ginfile nga kaso kriminal batuk sa alkalde. Ginpasakaan man siya sang kaso administratibo nga Grave Abuse of Authority, Gross Negligence, Gross Misconduct kag Acts Contrary to the Law.

Nagapati si Espinosa nga siya ang appointing authority sang mga miembro sang Board sang MIWD base sa ruling sang Korte Suprema sa kaso sang Metropolitan Cebu Water District. Sa opinion ni Villa, indi ma-apply sang alkalde sa MIWD ang nasambit nga ruling bangud indi man sila kabahin sang kaso.

(ATT)