Transport group CLIAJODA, may napaminsaran nga solusyon sa pagka-stranded sang mga pasahero sa terminals kon Lunes sang aga

Iloilo City–Pangdakpon ang mga public utility jeepneys (PUJs) nga nagalapaw sa ruta kag listahon ang mga wala nagbiyahe kag ipasa sa Land Transportation Franchising and Regulatory Board (LTFRB) 6. Pila lamang ini sa mga solusyon nga napaminsaran sang City Loop Integrated Alliance of Jeepney Operators and Drivers Association (CLIAJODA) sa problema sang mga pasahero nga nagaka-stranded sa mga terminals kada Lunes sang aga bangud sang kakulang sang jeep.

Suno kay Mr. Rizal Alido, Secretary General sang CLIAJODA, nagpakig-angut na sila sa Public Safety and Transportation Management Office (PSTMO), Land Transportation Office (LTO) kag LTFRB agud masolusyunan ang problema.

Naghingyo ang grupo sa PSTMO nga magbutang sang traffic aides agud magbantay kag mangdakop sang mga PUJs nga nagalapaw sa ruta.

Nagpasalig naman suno kay Alido ang LTO nga hugot nila ipatuman ang kasuguan agud masiguro nga nagabiyahe ang mga drivers.

Ipasa naman sa LTFRB 6 ang listahan sang mga PUJs nga wala nagbiyahe agud ma-summon ang operator.

Bangud sini, mahimo mabutang sa alang-alang ang frankisa sang mga PUJs.

Suno kay Alido, 900 ka units ang yara sa idalum sang CLIAJODA kag kun magbiyahe lang ang mga ini, wala sang pasahero nga ma-stranded sa mga terminals.

Pero nagakaproblema suno kay Alido bangud may mga units nga wala nagabiyahe halimbawa suno sa iya ang CPU Ungka nga may 200 ka units pero 30 lang ang nagabiyahe.

ATTITUDE SANG MGA DRIVERS

Gin-ako ni Alido nga naga-contribute sa problema ang mga obstruction sa dalan kag ginaobra nga karsada sa delay nga pagbalik sang mga jeep sa terminal rason nga nagapugok ang mga pasahero.

Pero mas problema suno kay Alido ang attitude sang mga drivers nga wala nagabiyahe kag nalipat na sang ila responsibilidad nga magserbe sa riding public.

PAHALINON SA ASOSASYON

Isa man sa ginalantaw nga tikang sang CLIAJODA ang pagpahalin sa mga miyembro nga wala nagabiyahe kag wala naga-ulikid sa mga pasahero.

Suno kay Alido, ginalantaw man nila nga posible magsunggod ang ila miyembro sa proposal nga pangdakpon ang mga ini ilabe na ang mga nagalapaw sa ruta. Pero kinahanglan suno sa iya nga himuon ini sang asosasyon bangud kun indi, posible nga mapasugtan ang plano nga pasudlon sa syudad ang provincial jeepneys nga maka-apekto naman sa kita sang mga city loop jeepneys. (AGB)