PMS Regional Head Ruby Plagata, nagwangal nga na-taken out of context ang una niya nga pahayag nga wala sang delayed nga road project sa syudad
Iloilo City–Gilayon nag-react si Presidential Management Staff (PMS) Regional Head Ruby Plagata kag nagpabutyag nga “na-taken out of context” ang iya pahayag may kaangtanan sa road projects sa siyudad.
Sa una nga interview sang Aksyon Radyo Iloilo sang Hulyo 24, ginpahayag ni Plagata nga wala sang delayed nga road projects sa siyudad kundi gina-extend lang bangud naga-ulan.
Ang interview ginhimo kasunod sang closed-door meeting ni Plagata upod sa taga-DPWH Iloilo City District Engineering Office kag Mayor Joe Espinosa sa Central Philippine University.
Gin-ako ni Plagata sa amo nga interview nga ang meeting resulta sang ginpadala nga sulat kag mga dokumento sang Aksyon Radyo Iloilo sa opisina ni Special Assistant to the President Christopher “Bong” Go angut sa mga proyekto sa siyudad nga tuman ka dugay ang pagtapos.
Wala nagparecord si Plagata sa amo nga interview pero nagpasugot nga i-quote siya sang Aksyon Radyo reporter.
Ang pahayag ni Plagata nagbaton sang madamo nga pagpakamalaut halin sa mga netizens kag tagpalamati.
Hulyo 25, matapos nagguwa ang report, ginpahayag ni Plagata sa Aksyon Radyo nga na-misquote siya. Suno sa iya ang buot niya silingon nga may mga rason lang kun nga-a nagaka-delay ang mga road projects.
“Common sense” lang suno sa iya para mahibaluan nga may yara gid sang mga delayed road projects.
Ang Aksyon Radyo Iloilo, nagamentinar nga WALA na-misquote si Plagata sa una sini nga pahayag. (JoMaque)