19 anyos nga lalaki, gindakup matapos nakuhaan sang ginapatihan laya nga dahon sang marijuana

Iloilo City–Arestado ang 19-anyos nga lalaki matapos nakuhaan sang ginpahayag laya nga dahon sang marijuana sa Prism Resto Bar sa Smallville Complex, Mandurriao las 12:30 kaina sang kaagahon.

Suno kay Chief Inspector Engilbert Banquillo, hepe sang Mandurriao Police Station, gin-citizen’s arrest sang bouncer/civilian guard si Kyle Jaresco sang Bangga Bante, Zarraga bangud nagpamalibad ini nga magparekisa sang iya bag.

Gintawgan sang pulis kag gindala sa pulis station si Jaresco kag sang ginrekisa, nakuha sa iya ang ginapatihan laya nga dahon sang marijuana nga nasulod sa box.

Nagapangatubang sang kaso nga unjust vexation kag paghupot sang illegal nga druga si Jaresco. (AGB)