2 ka suspects sa paghimulos sa nurse nga ila batchmate sa high school sa Pototan, natalana pasakaan sang kaso

Iloilo — Ipasaka sang Pototan police ang kaso nga rape sa duha ka suspek kon magpositibo ang medical checkup sa 28 anyos nga nurse nga ginhimuslan siya sang iya mga high school batch mates.

Pahayag ini ni PO2 Raquel Cayton, imbestigador sang Pototan Police Station, kasunod sang reklamo ni alyas Inday nga ginhimuslan siya nanday alyas Toto kag alyas Nonoy kahapon sang kaagahon.  Base sa imbestigasyon, ginsaysay ni Inday nga natabu ang paghimulos sa dalum balay nga nagaserbe nga bodega sang balay ni Toto apang wala siya nakabato bangud wala siya sang pwersa dala sang kahulugbon.

Antes ini, nagtambung ang tatlo sa pagtilipon sang ila high school batch mates sa balay sang isa nila ka batch mate sa subdivision sa banwa. Nagbakal sang dugang nga ilimnon sa banwa ang anum sa mag-batch mates upod kanday Inday, Toto kag Nonoy. Apang naghapit ang tatlo sa balay ni Toto bangud nagalingin ang ulo sini kag naghambal nga mapahapit lang sila kon magbalik na ang ila upod.

Ginpahayag nga wala man nakita ang tatlo sang ginhapit na gani nagbalik ang iban sa balay sang ila batch mate. Suno kay Inday, nakabugtaw siya mga alas-4 kahapon sang kaagahon nga isahanon na, baliskad ang bayo, bukas ang zipper sang pantalon kag masakit na ang pus-on.  Nagdireto si Inday sa police station kag nagreklamo sa pagpati nga ginhimuslan siya nanday Toto kag Nonoy.

Gin-ako sang duha ka lalaki suno kay PO2 Cayton nga upod sila nga naghapit sa balay ni Toto pero nanginwala sa akusasyon ni Inday. (JoMaque)